Маны кытта холбуу “Эрилик эрэлэ” диэн  Хадаар, Хайахсыт , Чакыр, Дириҥ, Одьулуун  оскуолатын  уолаттарыгар 2-с күрэҕэ ыытылынна.  Урут бу 4 нэһилиэк холбоһон «Эрилик Эристиин” аатынан совхоз диэн тэрилтэ этилэрэ. Ол саҕаттан билиыаллыы сытар нэһилиэктэр улахан дьоно куруук түмсүүлээхтэр, бэйэ-бэйэлэрин билсэллэр, ыһыахтарга, араас күрэхтэргэ хардарыта ыалдьыттаһаллар. Бу күрэх кэккэлэһэ сытар 5 нэһилиэк ыччаттарын икки ардыгар доҕордуу сыһыаны олохтооһун, уол оҕо сыанаҕа көҥүл тутта-хапта сылдьарын, саҥарар дьоҕурун сайыннарыы, саха оонньуутун сөргүтүү сыаллаах ыытыллар. Түһүмэхтэрэ бэйэни билиһиннэрии, саха оонньуулара (тутум эргиир, мас тардыһыы,ойбонтон уулааһын, өһөс торбос, көтөх ынаҕы туруоруу),өй оонньуута-таабырын таайыыта , талааны көрдөрүү. Үс уол күрэхтэстэ. Терентьев Дь Дириҥтэн, Тарасов А-С Чакыртан, Бандеров П.- Хайахсыттан. Бэртээхэй күрэхтэһиини көрдүбүт. Түмүккэ Тарасов Айыы-Cиэн Чакыртан бастаата. Биһиги уолбут “Күүстээх бөтөс” уонна “Көрөөччүлэр биһирэбиллэрэ” номинациялары ылла.

Кэлбит оҕолору кытта бэйэбит оҕолорбут кыттыһан 6 хамаандаҕа хайдыстылар. Биирдии хамаандаҕа 20-лии оҕо буолла. Бэйэ-бэйэни кытта билсиһии кэнниттэн девиз,аат толкуйдаатылар, плакат оҥордулар. Ол кэнниттэн “Чэ эрэ, билсиэҕиҥ” хамаандалар бэйэни билиһиннэриилэрэ буолла. Киэһэ 10 ч.30 мүн. Станцияларынан оонньуу саҕаланна. Эдэр дьон үҥкүүтэ суох табыллыбаттар,дискотека түүн 3 чааска диэри буолла. Түүн 3 чаастан араас спортивнай күрэхтэһиилэр, түмүктэри таһаарыы,дискотека, “Нас тут не было” операция сарсыарда 6 чааска диэри салҕанан барда. Сылайбыт, ол эрээри астыммыт Чакыр, Хайахсыт оҕолоро дьиэлээтилэр.